نوشو

نوشو

نوشو مرا تنها ننه

می دیل سر تو پا ننه،

واپرس چی ره

می ایجگره صدا ناره ؟

هارای بزن

هارای بزن

بیاف مرا

آویرا بوسته یم ،

بوسوخته گورشا بوسته یم،

اَ مورده شور بوشوسته زندگی دمخته یم.

نوشو مرا تنها ننه

کی تنهائی

جه خواب مرا دپرکانه ،

سورخ کولی تونگ آبا توله کونه .

زالش دارم

زالش دارم

تی ناجه من بدیل دارم.

تی غم مرا فوتورکسته

غورصه مرا فورسته

می زندگی هچین خوره فوگوردسته.

نوشو مرا تنها ننه

جه خاطره

عکسانه می ورجا بنه.

واژگان گیلکی

ایجگره : فریاد ،جیغ از ته گلو

هارای : داد ، هوار ، فریاد رسا

بیاف : پیدا کن

آویر : گم

گورشا بوستن : از سوختن خاکستر شدن

دمخته : لگد خورده، پایمال شده

دپرکستن : لرزیدن، ناگهان از خواب بیدار شدن

تول : آب گل آلود

زالش : تشنگی

ناجه : حسرت ، آرزوی محال و دست نیافتنی

فوتورکستن : حمله کردن ، هجوم آوردن ، یورش بردن

فورستن : بلعیدن ، قورت دادن

هچین : بیهوده ، مجانی

فوگوردستن : فرو ریختن