مورجه پلا

عکس سمت چپ یکماه قبل از شهادت مسعود
مرداد 1364

زمستان 1362

مورجه* پلا

ایمروز نهار مورجه پلا داشتیم. وسط غذاخوردن یاد امی سربازی شون دکفتم، روز بیستم آبانماه 1363 من و مسعود منصف اتوبوس جولو شوفر پوشت نیشته بیم . رشت ژاندارمری جلو وقتی اوستوار کاغذه از جعبه بیرون فاکشه یهو داد بزه ًچهلدوختر ً * اتوبوس کی پور از اعزامی به خدمت بو ایوارکی ساکیتا بوست ، چون کی اما سهمیۀ نیروزمینی بوبوسته بیم و او زمان هم زمان جنگ بو و نیروی زمینی هم بعد از سه ماه آموزشی همه روانا کودی جبهه ، هه تام بزه زاکانه میان ایتا از او اعزامیان بولند بولند بوگوفت :

اوخ جان چهلتا پسریم شوندریم چهلدوختر د امی میان داوا نیبه بهرکودام ایتا دوختر فارسه.

مارانه گریه میان ، خاخورانه ناراحتی و رفئقانه دیل ناگرانی میان اتوبوس راه دکفت جاده کناره بطرف گرگان و بعد هم شاهرود .

راه میانی بیدم کی مسعود فکره دره ، واپرسم : چیسه؟ خالا دوختره فکرا دری ؟ بوگفت : نه ، من مورجه پلا دوست نارم چی بوکونم ؟ آخر گیدی سربازی مورجه پلا زیاد فادید.

بوگفتم : تی درده من دوا کونم.

واپرسه : چوتو ؟ بوگفتم : تی پلایه من خورم هاتو. خانده بوکود هیچی نوگفت.

من مسعود منصف امرا او سرخبنده محل میان بوزرگه بوستم ، اونه پئر ناصر آقا می پیله برار رضا آمرا رفئق بو. مسعود اولی زاکه خو خانواده بو من آخری.

امی رفاقت از او زماته قبل از مدرسه به اصطلاح قدیمیان دوران مُلاخانه شروع بوستی ، از اول دبستان تا سال سوم راهنمائی همدیگر پالو نیشتیم تا کی دوران دبیرستان فارسه .

مسعود زاکه فنی بو و منم بیزار از آچار و پیچ گوشتی . اون بوشو هنرستان منم بوشم اَکابر.

از تظاهرات و درگیری و جنگ خیابانی با کوکتل مولوتوف زمان انقلاب تا مسابقات فوتبال محلی و باشگاهی ، همش همدیگره امرا بیم تا او روز کی سربازی شوندبیم.

چالوس دوره بر راننده بداشت کی نهار بوخوریم ، نهار بوخورده پسی 7 نفر جیم بوبوستید بمانستیم 33 نفر، راننده یکم منتظر بئسه تا شاید بایید ولی از کسی خبری نبو بعد واگردست بوگوفت : هتو اگر پیش بیشیم من و می شاگرد

باید بیشیم پادگان خودمانه معرفی بوکونیم. شاگردم تومام راه میانی چرت بزه ، وای به او روزی کی اون جنگ بوشو بی.

هاتویم بوبوست بعد از شامم 5 نفر دیگرم جیم بوبوستید .

چهلدوختر کی ایتا پادگان آموزشی بو امرا قبول نوکود. ایتا افسر واگردست راننده بوگوفت: ًجا نداریم برید شاهرودً.

ایتا از اعزامیان واگردست بوگوفت: از اما زرنگتران باموئید چهلدخترانه ببردید. اینفر دیگر بوگوفت : آقای راننده تا امرام نبردید گاز بدن بیشیم.

امرا روانه کودید پادگان شاهرود. یکهفته ای بو قدم رو شوئیم و آموزش نظامی دئیم تا کی ایروز نهار امرا مورجه پلا فادائید. من می کاسه پلایا زود بوخوردم بعد واگردستم مسعودا فاندرستم ، بوگوفتم : پلایا نوخوری فادن مرا . مسعود اصلاً خوره ننه توند توند مورجه پلایا بوخورد ایتایم لیوان آب اونه پوشت سر بعدشم واگردست مرا بوگوفت : مورجه پلا چقدر خوشمزه بو من نانستیم.

10 ماه بعد مسعود جبهه سومار میان شهید بوبوست ، بوشو و خو داغه تا ایمروز می دیل میان بنه .

صُب نیبه کی چوم واکونم مسعوده یاد نوکونم.

*مورجه> عدس

چهلدختر> پادگان آموزشی استان سمنان که وابسته به مرکز آموزشی 02 شاهروده.

کاشکی تو بودم ای رفیق